| |
| ||||||||||||
|
| |||||||||||||||||
| |||||||
 |
| | LinkBack | أدوات الموضوع | تقييم الموضوع | انواع عرض الموضوع |
10-12-2008, 03:19 PM
| المشاركة رقم: 1 (permalink) |
شكراً: 0
تم شكره 0 مرة في 0 مشاركة
| ..." وَي يَا حَلاتِي .. حَدِّي أَهبِّل "... يوم من التاريخ ... {خذ الحكمة من أوسكار وبنت خالتها} يا مسااااااء الفل والياسمين على أحلى ناسات في العااااالم إزّيكو؟! عاملين إيه؟؟ المهم ندخل في الموضوع << بدينا في الجد هذا الله يسلمكم قبل بداية المدرسه بكم يوم قررت الشلة الكريمة انها تعمل حفلة DG بمناسبة قرب فتح المدارس وانتقالنا إلى المرحلة الثانوية .. أنا وبنت خالتي من نفس العمر وفي نفس المدرسة وصديقات لدرجة أنها تجي تنام عندي يوم واليوم الثاني أنام عندها في يوم الحفلة جت لي البيت ولبسنا و تكشخنا وصبغنا وجيهنا باحسن أنواع الميك آب "ماكس فاكتور- كريستيان ديور- سان لوران..إلخ" ونفشنا شعورنا ووصلنا سواق بيتنا للقاعة : مؤمن "السايق" : ماما أنا ما يقدر يجي قبل الساءه تلاته نس. أنا: نعم نعم؟؟ أي خدمة؟! أنا من الحين نعسانه وأنت تقول لي تلاته نص؟؟ وش ناوي علييه أنت وخشتك؟! حدّك ثلاث. مؤمن: لكن ماما أنا ما يقدر .. بابا يقول لازم يروح جبيل سوي سقل كتير. المهم نزلنا من السيارة .. بنت خالتي تلتفت لي وتقول: أنتي عن جدك نعسانة؟؟ أنا: لا يا الخبلة بس هو يخاف إذا قلت له أني نعسانة لأني مثل ما تعرفي إذا نعست أتحول إلى كائن متوحش للغاية.. بس إذا الأمر من الحكومة .. أمرنا لله.. مشينا!! دخلنا القاعة وطبعًا بتنفجر من كثر المعازيم وصوت الدي جي واصل لأمريكا الشمالية.. نسمع صوت وحده من الربع: هيييييييييييييه يا صبايا اخلصو نبي ندخل يالله تعالوا اخلعوا عباياتكم بالغرفة .. بعدها رحت أنا ووحدة من شلتنا لبسنا ثياب رجال وتلثمنا بشماغات .."بحكم أننا نحيفات الشلّة قطوا علينا هذي المهمة" ومسكنا سيوف <<سيوف حقيقية مش لعبة.. أما الباقي اللي لابسات عباياتهن واللي لابسات فساتين قصيرة وحاطات على عيونهن أقنعة.. كأنهم باتمانات خخ... و دخلنا أنا وخويتي" الرجال" في البداية ومعانا ثنتين لابسات عبايات ورقصنا على أغنية – يا داري لاهنت ولا هان راعيك – وبعدين الباقي بعد دخلوا .. وقامت القيامة على ذيك المنصّه ههههه بس والله كانت دخلتنا رهييييبة بعدها دخلنا الغرفة ولبسنا فساتبننا وعدّلنا خششنا اللي اعتفست فوق تحت من كثر الرقص.. بعدها طلعنا وجلسنا مع الشلّة واشتغلت السوالف والتعليقات على المعازيم <<جمعة بنات وش تبون!! لمّا جت الساعة 12 ونص.. كنت أرقص ع المنصّه وهائمة في السماء السابعة "حاطين أغنية مايا نصري - أخبارك إيه- عشق طفولتي خخخ" سحبتني بنت خالتي للحمام ..وأنا ودي أتوطّى في بطنها .. أنا: هيه أنتي وش فيكي يا خبلة ألحين أنا أرقص.. وما أستبعد أن كل المعازيم يناظروني .. تقومي تسحبيني بذي الطريقة-وأصر على أسناني ـ حماااااارة. هي: هي هي أنتي لا تسبين ..قال إيش قال كل المعازيم يناظروني..على شنو؟ ما تقولين لي أنتي وخشتك ذي.. كأنك خروف.. أنا: أقول تلايطي مناك بس .. تغارين مني لأني أحلى منك.. ـ وأصرخ بكل ما أوتيت من قوة ـ خلـــــصي شتبيييييــن ؟؟ جايبتني الحمام عشان تقولين لي أني أشبه الخرووف ؟؟ هي: لا بس..عورني راسي أبي أطلع.. أنا"بصراخ": وش أعمل لك؟!! "وأهدى"..تبين الصدق..حتى أنا أبي أرجع البيت..أبي أناام هي: أوف منك..خيشة نوم..دائمًا وأبدًا..اتصلي لأخوك قولي له يجي ياخذنا.. أنا: ويك ويك ويك ..بخ بخ بخ.. دخ دخ دخ..هع خع بع.. ما يضحّك..اللي يسمعك يقول ما تعرفين أخوي.. لو أموت ..لو أصعد لربي ما وصّلني..! اتصلي لسوّاقكم.. هي: اتصلت له وما يرد هالخايس.. أنا: حسني ألفاظك يا بنت!! أقولك ..باموت من الجوع.. والبوفيه ما راح ينفتح إلا الساعة ثلاث..وبيتيفورهم هذا جاب لب حومه..!! شوفي لك حلللل هي: عندي لك فكرة.. بس لا تصفقيني طراق إذا ما عجبتك..!! ما في داعي للعنف.. أنتي بس قولي وبقلب خشتي.. أنا: قولي.. أمري لربي!! هي: وش رايك نطلع نشتريلنا بلع وناكله ونرجع!! ولا كأن شي صار؟! كازاباستا قريب من هنا أنا:يا إلهي أنت جاهي..ـــ وأأشر على راسها ـــ شنو هني أبي أفهم؟!! هي: قوطي أناناس فاضي ومصدّي بعد..شعندك؟!! أنا: سلامتك؟! ما تقولي لي بالله منو بيوصلنا؟! هي: الله يخلي لنا رجولنا.. أنا: نعــــــــــــم؟؟؟؟؟ شو تفضلتي بالله؟؟! هي: اللي سمعتيه..عادي وش فيها ؟...الجو يجنن!! حاصل لك؟؟! أنا: ووين راح ناكله يا ذكية؟! هي: عادي.. حتى لو في الحديقة العامة..مو بعيدة كثير.. أنا: لااا مو بعيدة.. أبد أبد..!!مين قال أصلاً ؟؟ بس بس يبيلنا ثلث ساعة ع الأقل حتى نوصلها.. ياعيني عليكي وعلى إقتراحاتك الذكية جدًا!! هي: يا بنتي رياضة!! أنا: أيييييوه!! قلتي رياضه هاا؟! وإذا شافني أخوي؟؟ هي: عادي مستشفى سعد قريب.. أنا: آه منّك.. أمّا نذاله.. هي: هههههههه أمزح وش فيكي..ما علينا.. وش بيضرك لو تلثمنا؟؟ أنا: إيه عشان يقوم المغازل على أصوله ..عاد شبابنا ما شاء الله عليهم..البنت لو تطلع الشارع بدون عباية..ولا يهتموا لها.. لكن خليها تغطي نص وجهها!! يموتون على تراب رجلها!! هي: والله هذي انتي اللي عيونك مثل عيون البقر أنا: بقر بعينك يا الفلبينية!! هي: والله انك بقرة..قصدي أنهم واسعين وحلوين وفيهم ميك آب دخاني..عز الطلب والله.. أنا: أقول..بلعي العافية..يالله مشينا.. هي: يعني وافقتي؟؟؟ أنا: إيه وافقت..اخلصي يتبع..
ــــــــــــــــــــــــ من مواضيعه : ــــــــــــــــــــــــ التعديل الأخير تم بواسطة Oscar ; 10-12-2008 الساعة 03:21 PM |
 |  |
|
10-12-2008, 03:24 PM
| المشاركة رقم: 2 (permalink) |
|
شكراً: 0
تم شكره 0 مرة في 0 مشاركة
| طلعنا من القاعة بالتّسحب ..ومشينا مسافة وقدرها إلى أن وصلنا المطعم وطلبنا صحنين باستا وبيبسي.. وفي الطريق كل شوي وحدة تحمل الأكياس.. وكل ما مرّت سيارة اللي يقط رقم واللي واحد يطلّع راسه ويصفر..وكلام سخيف..واللي يعلّي صوت المسجلة!! خاصةً أننا طويلتان شوي يعني ما يبان أننا لسّا أول ثانوي..طبعًا أستخدمنا معهم أسلوب التطنيش مع أن في داخلي أحس كأن في قلبي عشر طبلات من الخوف.. جااااء الفرج بعد عناء طويل استمرينا في المشي نصف ساعة وليس ثلث ساعة!! طبعًا ما يحتاج أقول لكم عن حالة مكياجنا المزرية!! قطينا الأكل ع الطاولة وشلنا اللثام واشتغلنا بللللع.. والناس رايحين رادين وحنّا ولاااا طاقين لهم خبر مشغولين في أشياء أهم ـــ مثل ما يقولون "عند البطون تنحول العيون" ــــ بعد ما قضيت على كل اللي في الصحن حسيت بانفجار.. يا ربي شلون بمشي!! قررنا ناخذ بريك إعلاني عشان نهضم شوي..وحنّا نهذر..بقدرة قادر طاحت عيوني على الباب وشهقت لكم ذيك الشهقه اللي خلتني أغص..يا ربي هذا أخوووي .. أنا: ولييييه!! وش جابه الحين؟؟؟ وش هالحظ كلّه منك يا ربي وش اسوي؟؟.. هي: أقول انكتمي وتلثمي واخلصي قدامي بنطلع..تلثمنا وجينا نقوم إلا في واحد قاط علينا الرقم..بنت خالتي الخبلة قامت و شقّت الرقم وقطته بوجهه "مش وقتها أبدًاااا" جينا بنمشي ـــ طبعًا وحنّا ساكتين.. عشان لا يسمعنا أخوي ونروح في خرايطها ـــ إلا نسمعه يقول: أفااا ليش عاااد؟؟ على فكرة عندي دفتر أبو200 أنا ما تحملت حالي شلت البيبسي من فوق الطاولة وعلى وجهه..ورفعت عباتي ومسكت يد بنت خالتي وركيييييييييض<<لااا..سيندرلات خخخ لما وصلنا قريب الباب..كان هناك زحححمة شباب..ما نشوفهم إلا صاروا طابورين..وعبرنا من وسطهم وحنّا نعبر نسمعهم بصوت واحد: سااارعي للمجد والعلياء مجدي لخالق السمااآاء.. بعد ما صرنا بعيدين عنهم شوي وقفنا و نضحك كأنّا مهابيل..جينا بنرجع القاعة..بعد عشر دقائق مشي انتبهنا أن في ورانا ثلاث شباب لكن ما خفنا لأن الطريق كان زحمة..قاموا يلحقونا من مكان لي مكان.. بنت خالتي تهمس لي: يمممه وش بيسوون فينا؟؟ أنا: وش بيسوون فيكي يا خبلة بياكلونك؟؟ما تشوفي زحمة الشارع؟! قالت:خلينا نعبر من ذا الشارع عشان نكتشف..يلاحقونا ولاّ لأ.. أنا: وإذا كانوا يلاحقونا؟! هي: بنتصل بالشرطة طبعًا.. أنا كانت فيني الضحكة بس ما طلعتها لأن الشباب قريبين منّا بعدين دخلنا شارع وغويناهم.. هي: هييّيا..شفتي أنك لولاي أنتي في ضيااع.. أنا: لا والله!! فكّرت في نور!! هي: وع يا ثقل دمك!! ... أنا كنت أبي أرد عليها عندما اكتشفت أننا ضعنا.. أنا: يااا سلام عليكي أقول وين جبتينا؟! هي: هاه!! والله مدري!! يا ويلي حنّا ضعنا!! كانت يدي على وشك أنها تحط على وجه بنت خالتي الهبلة وبالتحديد على عينها لما مرينا على بيت كان أمامه أربعة شباب لكن صغار شوي يعني شكلهم تحت العشرين كانوا متجمعين وجالسين.. - ما شاء الله ثنتينكم نفس السايز.. ما في طويله..قصيره..نحيله..عريضه وقاموا يضحكون<<والله لو في يدي رشاش كنت أفنيتهم عن آخرهم.!! بس للأسف ما بيدي غير شنطتي..فكرت أكسر راس واحد منهم بعطري لكني هدّيت نفسي<<لا لا.. قويه يتبع..
ــــــــــــــــــــــــ من مواضيعه : ــــــــــــــــــــــــ التعديل الأخير تم بواسطة Oscar ; 10-12-2008 الساعة 03:30 PM |
| | |
|
10-12-2008, 03:40 PM
| المشاركة رقم: 3 (permalink) |
|
شكراً: 0
تم شكره 0 مرة في 0 مشاركة
| مشينا ومشينا إلى أن افترت روسنا وحنّا بس نلف يمين..شمال طالعت الساعة وكانت ثلاث إلا خمس ..ياربي بعد35 دقيقة راح يجي سايقنا..وإذا جاء وما كنت هناك رحت وطي.. اقرأوا علي الفاتحة من ذا الحين!! بنت خالتي: هييييييييئ<<شهقةخخ..طالعي هذي البقاله.. يعني نروح سيده ونلف يسار ونشوف القاعة..ياهوووووووه.. بصراحه من الفرحه كانت عيوني بتدمع..بس ما حبيت أسوي مسلسل تركي<<راحت موضة الأفلام الهندية خخخ".... كان الشارع طويييل وفاضي..خطرت على بالي فكرة جهنمية أنا:وش رايك نسوي سباق..! هي: والله لك خاطر!! يمه منك ما تعبتي؟؟صار لنا ساعتين وحنّا بس نمشي.. أنا: أقول..، ما علي منك.. ومسكت صندلي"أكرمكم الله" وركييييــــــض وبنت خالتي مش قادرة تلحقني من التعب.. هي:هييييييييه وقفي وقفي لحظــــــــــة...وأنا ما علي منها... وصلنا القاعة وأنا مش قادرة أتنفس..دخلنا وحنّا متغطيات وسنتتــــــــر ع غرفة التواليت بنت خالتي أول ما شافت وجهها بالمرايه إلا تشهق ذيك الشهقة: يمه شنو هذا؟؟..شلون أطلع بذي الخشة؟؟.. قسمًا يكرم إنجا نجون عني!! أنا: هههه لا تخافين الحل عندي وأنتي أم هندي جبت علبة المكياج كاملة في الشنطة.. أجل ليش ماخذه شنطة زي البغل من كبرها؟؟.. هي: وأنا شدراني!!هذي الموضه الآن..لكن والله أنك تنفعي لحالات الطوارئ.. أنا: وش على بالك؟؟..إحم..إحم.. هي ـــ تسحب الشنطة من يدي ــــ : هااتي بس بتذلينا مع وجهك!! بعد ما خلصنا استصلاحاتنا طلعنا وكان البوفيه شبه مخلص.. شافتنا وحده من الربع: أنتوا وينكم ليش ما تعشيتوا!! أنا: هاه!!لا بس مو جايعين..هه.. - مو جايعين!! اعترفوا وين كنتوا؟! أنا: يا بنتي وش لك بالهذرة الفاضية..ويلي..قالوا نساك ما أستحمل لازم أروح أرقص<<أضيع الموضوع - وليش ما رقصتي عليها من شوي..هذي ثاني مرّة يحطونها.. أنا في بالي"يا ذي البلشة..وهالخديه بنت خالتي واقفة مثل تمثال الحرية جنبي!!" أأ..كنت..كنت بالحمام!! -لا إله إلا الله!! بالحمام طول الأغنية بالحمام..وش تخترعي هناك.. بنت خالتي ــ وأخيرًا تلحلحت ــ : يمممه منك..حشى المحقق كونان مش بنت.. ..رقصنا ليما تكسرت رجولنا وقريب الفجر رجعنا البيت..بس بصراحة كان يوم من التاريخ.. ......... نصائح مني إليكم ............. 1- إذا بتطلعوا من البيت لا تطلعوا إلا وفي شنطاتكم دليل سياحي للمنطقة اللي بتروحوا لها وتاخذوا معكم سلاح"مسدس - سكين- خنجر" 2- لا تستلقعوا ع الأكل.. واصبروا فإن الله مع الصابرين.. 3- لاتعملوا مغامرات انتوا مش قدها وخصوصًا إذا كانت من اقتراح شخص أهبل مثل بنت خالتي 4- يا نسااااااء السعودية.. يافتيا..يا صبايا..طالبوا بحقوقكم في قيادة المرأة للسيارة تكسرت رجولنا  ..وسلامتكم..هع
ــــــــــــــــــــــــ من مواضيعه : ــــــــــــــــــــــــ |
| | |
|
( تقرير عن مشاركة مخالفة
)
| أدوات الموضوع | |
| انواع عرض الموضوع | تقييم هذا الموضوع |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| مستحقات مهرجان اعتزال ماجد ضاعت بين ""موبايلي"" و""صلة"" | صحفي | جريدة الرياض | 0 | 11-13-2008 03:30 AM |
| """"""" أمـــثله (بدووووويه) عتيــــــجة ومقــــبرة """""""" | أجودية | مرسى الشعر | 7 | 11-10-2008 07:27 PM |
| "أسوار 2" يقرع جرس "الجدل" مجدداً بقضايا "الاغتصاب" و"الأخطاء الطبية" و"الشعوذة" | صحفي | ثقافة اليوم | 0 | 02-03-2008 04:20 AM |
| "موهبة" و"غرفة الرياض" و"المئوية" و"المال الجريء" تحشد طاقاتها لتمكين القدرات الوطنية | صحفي | الرياض الاقتصادي | 0 | 01-20-2008 04:20 AM |
| عرض نماذج لتطبيقات "التوظيف" و"السجل التجاري" و"خدمة مقيم" و"أساليب في الريادة في الا | صحفي | مرسى التقنية و أخبار التكنلوجيا و الأنترنت | 0 | 11-25-2007 04:31 AM |
|
| الإعلانات النصية المدفوعة | ||
| سلم الرواتب | فوركس | توبيكات |
| ضح رابطك هنا | ضح رابطك هنا | ضح رابطك هنا |
| ضح رابطك هنا | ضح رابطك هنا | ضح رابطك هنا |
وَرْشةْ تَصمْيمْ الأَوسِمْةَ 
يـآزينْ بعضْ
آلغبآء لآإ صـآإرْ
أنـآإ ألمعنىـآإ .. 
صور لنا سطح مكتبك
:) 
₪ ₪ فيروزيات شتوية(حصري للمنتدى) ₪ ₪ 
العرض العادي
