 محاضرة كتابية للشيخ يوسف الصالح روووووووعة (الجزء الأول)
بسم الله والصلاة والسلام على رسول الله السلام عليكم
شباب أنا سعيد أني أكون معاكم واشكر الإخوان اللي قدمولي الدعوة وجايكم اليوم للمنطقة الشرقية احمل لكم رسالة بس دائما لما أتكلم أبغاكم تعرفون حاجة واحدة إني أنا ماني جاي أشهر بمعصيتي عندكم ولا جاي إني أتباهى فيها ولكن أنا جايب رسالة وجاي أعلمكم عن عالم غريب ما أتمنى في أي يوم من الأيام أي شخص فيكم موجود هنا أو خارج هنا انه يوقع فيه عالم أصبح الحلال حرام والحرام حلال عالم ما تمسكه قيود فيه من العبث فيه من النذالة فيه من الوسخ فيه من أشياء كثيرة اللي سببت الألم لي وللي حولي أنا سبق وقلت لكم كانت مشكلتي هي حرية شخصية وكنت أتوقع إني أنا قاعد أؤذي روحي بس والعالم الثاني مالي شغل فيه ولكن اكتشفت في الأخير إني أنا قاعد أؤذي روحي وأؤذي كل الناس اللي حولي وهذا الألم الشديد اللي أنا حصلي .
أنا قبل أكون معالج في مستشفى الأمل في الدمام كنت مدمن مخدرات لمدة 20 سنة سفينة أبحرت فيني لمدة 20 سنة وكانت السفينة مهجورة ما بيها إلا أنا مرات ترفع فيني ثم تنزلني تحت ولكن كانت رحمة الله هي فوق كل شي أنا الحمد لله أن الله أنقذني بعد 20 سنة ولكن والله عندي أصدقاء ما يعلم بحالهم إلا الله وأنا رح أجيبلكم قصص من أشخاص أنا شفتهم ماتوا وأنا كنت أتعاطى معاهم
بس بالبداية أبغى أعرفكم مين المدمن يقولون في واحد طقت عنده سبيكة في مخه فراح للدكتور قالوه أوه سبيكتك هذه مخروطة لازم تغير مخك فقال له يا دكتور من وين بتجيبلي مخ قاله في واحد هناك فاتح سوبرماركت يبيع مخوخ روحله ودش عليه واشتري من عنده مخ فالرجال تحمس وطق الباب على الرجال وقاله يقولون انك تبيع مخوخ وأنا أبي اشتري مخ مخي ما به فايدة قاله اتفضل المستودع وقاله هذا مخ دكتور يساوي 250 ألف ريال وهذا مخ محامي يساوي 500 ألف ريال وهذا مخ مدمن يساوي مليون ريال . تعجب هذا شلون الحين مخ المدمن أغلى من مخ الدكتور والمحامي قاله صاحب السوبرماركت إيه لان هذا جديد بعده ما استعمله فكل واحد قاعد يتعاطى مخدرات وكحول أنا متأكد 100% انه ما قاعد يستخدم مخه كل واحد يدمن على المخدرات والكحول أنا متأكد 100% انه ما قاعد يستخدم مخه ولا قاعد يستخدم عاطفته ولا مشاعره ولا إحساسه أبدا يصير على دقيقه وأنا كنت واحد منهم كنت أقول كلها يومين واطلع من المخدرات كلها يومين وانتهي هالصيف هذا أبي انتهي ويجي صيف ويروح صيف ويجي شتاء ويروح شتاء وأخينا بالله إلا ما انتهى أقول الحين عمري 17 سنة خلي يصير عمري 20 ورح اترك المخدرات أنا قاعد أقول مو مخدرات أنا قاعد أقول الدخان لو فيه خير يقول الواحد أنا بتركه! بيسكت على روحه ويقعد يلعب لعبة مع روحه ويقول خلاص هالمرة وهالمرة لحتى صارت 20 سنة والله يعلم كيف هال20 سنة كانت
قبل لا ابدي بقصتي رح ابدي بشيء واحد يا إخوان من أسباب تعاطي المخدرات والوقوع في المخدرات شيء ثمين لو أقول لكل واحد فيكم شو الشي الثمين اللي عندك الحين واحد يقول ساعتي واحد يقول شماغي واحد يقول سيارتي واحد يقول بيتي كل واحد عنده شي ثمين وهذا الشي الثمين ما يتمنى انه احد ياخذه . يعني أنا بقولك تعال أنت لو بتحب إنسان أعطيه أغلى شي عندك شو تعطيه؟ ساعتك اللي تحبها ؟ لا. أول ما تشوفه تقول هذه ساعتي اللي احبها كي لا يقولك اعطني إياها . فكيف حنّا نسمع أنا نعطي الأشخاص شي ثمين وتتوقعون شنو الشي الثمين اللي حنا نفرط فيه وندش في المخدرات وش يا شباب؟ ترف؟ لا. وش هو عقل؟ لا . أول حاجة يتنازل عنها الشخص اللي بيدش في إدمان المخدرات هو دينه أول شي الدين ويوسف الصالح أول ما فرط في دينه وعشان كده يوم فرط في دينه صر ماله أهمية لأنه في شباب كثيرين أنا قاعد أشوفهم وأنا كنت منهم ما يدري الله وين حاطه وياهم وياهم عليهم عليهم صلوا الساعة صلى وياهم إذا واحد شغل مسجل غنى وياهم ما يدري وين حاطه ما عنده شخصية محددة هذا يوسف الصالح كان في البداية ما عنده شخصية محددة طبعا الظهر في المدرسة رايح يدرس ولكن المرغب والعشاء أنا مع جماعة المسجد لأنه أبوي يبغاني أروح المسجد فصاير عليهم المغرب والعشاء شيخ وبعد العشاء قعدنا فوق البارحة وسوالف غراميات كنا المغرب والعشاء شيخ وآخر الليل رومانسي شاعر صار الصبح صار طالب صار الظهر صار يلعب كورة لاعب كورة أي شنو شخصيتك ؟ ما ادري. بس مع القوم يا شقرا ما عندي شخصية وعشان كده أنا كنت صيد سهل فرطت في ديني وكنت اسميهم معقدين . يوم كنت في المكتبة معاهم في المسجد كنت أقول لأحد ربعي متى الله يفكنا من المعقدين هذول. تدرون أول مسكه انمسكت فيها كنت رحت فيها إعدام كنت العب ويا ناس كورة ما ادري من هم بس أجي جاهز والعب كورة معاهم شوي وإلا الدوريات علينا في الملعب أخذونا طيب أنا ماسويت شي يودونا للشرطة ويسولنا حفلة كيك وأعطونا كل واحد هدية طبعا هدايا مغلفة عبارة عن كفوف فانا قاعد اتسائل ويا روحي وأنا في سيارة النجدة أقول ليش ماخذيني أنا ما سويت شي ويوقولي العسكري هس هس . كنت أبي اعرف ليش ماخذيني أنا مو بس أبي اعرف ليش ما خذيني أنا بعد خايف من الشاكوش في البيت لما يقتلني يسويلني يوم جينا عند الضابط قال منو فيكم سارق أنا والله ما سرقت طاخ طيخ طاخ اعترفوا 3 من لاعبين الكورة إنهم سرقوا يوم يقول الضابط معاكم 5 سلموهم قلتله يا ضابط أنا ما سويت شي قالي لا أنت سويت أكثر شي قلتله وشو قال ماشيت ناس ما تعرفهم أسلوبهم وكثير من الشباب يسوي صداقات ويسوي أفلام هندية ويا واحد ما يعرفه قبل شهرين ما ادري مجرم حرامي هو سارق ويهديه كل شي وأول شي يهديه دينه رجاجيلك هذول هذاك طبعا جايك غرقان ويبي يغرقك فيجيلك يقولك هاه هذا لقوني اش لك ويا المعقدين هذول يا أخي تعال خلنا نطلع نتمشى هاه قاعد يسرق دينك منك يسرق أهم شي عندك اللي هو الدين . دينك كرامتك . أنا أقول إن الدين حاجة محتوية على أشياء كثيرة قاعد يسرق منك صلاتك قاعد يسرق منك إيمانك ليش لأنه هو سرقوا من عنده أول فهو يجي يسرق عندك وما يسرق إلا أغلى شي تعالوا شوفوا لو أنت ما عندك دين ولا تصلي ما احد يجيك
يا إخوان انتبهوا شياطين الإنس أقوى من شياطين الجن انتبهوا يجيك انه حبيبك وأخوك وحياتك وبعدين تلقاه هو اللي يحط السكين على رقبتك وهو اول من يحز (( يوم يعض الظالم على يديه يقول يا ليتني اتخذت مع الرسول سبيلا يا ويلتاه ليتني لم اتخذ فلانا خليلا لقد أضلني عن الذكر بعد اذا جاءني وكان الشيطان للإنسان خذولا)) والله هو أول من ينحرك لما يسيطر على الدين حقك خلاص يكون حطك في الحفظ شفتوا الناس المعاريس شلون يخشون القفص الذهبي الواحد فينا يخش القفص الناري عيشة ضنكة والله كنت اطلع من البيت ما ادري رح ارجع للبيت وإلا ما رح ارجعله عمركم شفتوا واحد يطلع من البيت ما يدري . أبقولكم على سالفة كنت يوم من الأيام قاعد أروج حشيش ويطقون الباب ناس وايد مروج وإلا يطق علي واحد الباب وعليه كرت بطاقة هنا مكتوب عليه التعداد السكاني أنا قلت رجال المباحث مسويلني حركة وامسك الرجال وافرشه عند البيت تعداد سكاني ها؟ أوريك قلت علي أنا. لأنه أنا يوم كنت أتعاطى افتكر انه أنا ذكي افتكر انه أنا واعي يا الله أغبى واحد في الدنيا كلها يوم وانا اتهاوش أنا واياه طلع اخوي وقف عند الباب ايش فيك قال الرجال يا اخوي هذا كرتي أنا من التعداد السكاني قالي ايش سويت في الرجال قلته لا هذا مباحث كل واحد يطق البيت أخاف يكون مسوين علي كمين وحينها طقت في مخي ليش ما يكون اخوي متفق مع رجال المباحث صرت أطوف ورا اخوي ادخلوا المجلس ادخل وراهم وقاعد أطالعهم ويسال اخوي سؤال وأقول آه يا الكذابين تسونها علي والله قاعدلكم هنا فراح سأل اخوي قاله كم عدد السكان؟ كم عدد البيت عندكم؟ قال حنا 8. قال له اخوي 7 . وقفت قدامه اطل عليه شلون 7 حنا 8 وأقول حق اخوي حنا 8 واهو ملح 7 . طلع الرجال من المجلس والحق اخوي قلتله تعال أنت قلتله 7 وحنا 8 . قال من ال8؟ قلتله أنا طبعا أنا عديت حالي أول واحد . أنا قالي منو أنت؟ قلتله أنا ساكن وياكم قال أنا ادري وين تنام الليلة ليه نتعدّ على الحكومة مرتين أول اثبت وين أنت تروح وخلهم يعدونك . كلامه صحيح يعدوني في المقبرة وإلا في السجن وإلا وين وإلا في البيت ما كان عندي محل ثابت ترى ما كان عندي كروت اكتب عليها يوسف الصالح ص . ب ما بي مكتوب عليها خ ف ، ص ب ما بي صندوق بريد ما بي إلا خرابات أول ما يسيطر على دينك يبدي يلعب بيك عاد أوه روموت كونترول يمين يسار الحين بعده ما أعطاك مخدرات بعد يحاول يسحب منك كل شي زين
بعد الدين يبي يفرقك من اهلك وبالوالدين إحسانا (( وقضى ربك إلا تعبدوا إلا إياه وبالوالدين إحسانا إما يبلغن عندك الكبر احدهما أو كلاهما فلا تقل لهما أف ولا تنهرهما وقل لهما قولا كريما واخفض لهما جناح الذل من الرحمة وقل ربي ارحمهما كما ربياني صغيرا)) بيني وبينكم من يطبق هذه ومن فيكم يرددها عقوق الوالدين حنا فسرناها على كيفنا الله يقول لك لا تقل لهما افا وحنا باليوم نقول لهم 100 مرة لا لا لا. قلنا لا غير أف لانا حنا ترجمنا كلمة لا غير أف . وبالوالدين إحسانا تعال شوف يوسف الصالح وش يسوي مع والديه أنا والدتي توفت قبل عدة أيام الحمد لله إنها ماتت وهي راضية علي اويلاه لو هي ميتة وهي مو راضية شو بيصير بحالي اويلاه لو مو انا اللي منزلها القبر شو بيصير بحالي رحت حق أمي وقلت لها امي قولولي أنا وش ضريتك بالتعاطي مالي قالت ايش ضريتني يا يوسف أنت تقعد من الصبح لليل ومن الليل للصبح عند ربعك وأنا ما انام استناك عند باب الشارع يوسف ابغاك تعرف حاجة واحدة إن قلبي يحس فيك ولا يحتاج لجواز ما يحتاج قلبي متصل مع الله بيك تعرفون الرنية أخذوني حق الشرطة وكانت الساعة 12 بالليل بكلم الضابط قالي كلم اهلك كلمت بالتلفون ردت علي أمي سكت يوم تقولي يوسف تكلم قلتلها يومه أنا بتأخر ربعي عازميني وأنا بتأخر قالتلي يوسف عليك الله ما بيك شي قلتها والله يومه لا ما بيني شي قالت لا يوسف أنا ويا أذان المغرب قلبي عورني أول ما عورني قلبي قلت يوسف بيه شي يوسف أنت بيك شي قلتها أي يومه أنا بالمغرب انصدت قالت شفت قلبي حس فيك وأنت بالرنية وحنا لا حياة لمن تنادي لا حياة يروح يسهر هو وربعه على البحر والأم كذا بالبيت (تحرق أعصابها من الخوف والقلق) يا أخي حس فيها ارفع تلفون وقل لها أنا بتأخر لا يعلقها لازم يعلقها
جيت حق أبوي قبل لا يتوفى قلت له يابه ابيك تقولولي انا وش ضريتك بالمخدرات قال يا ولدي انت ضريتني خليت راسي ينزل بالقاع لا أروح مجالس ولا اعرف اروح مسجد كل الناس يتكلمون عنك . ابونا لما يدش البيت نلعب صمت فيكم خير تكلم انا ابوي لما يدش البيت أصير وز ولما يطلع من البيت طاخ طيخ طاع كان ابوي لما يصعد الدرج الفجر وانا بغرفتي فوق السطح يبي يصحيني على صلاة الفجر كنت اسمع كحته واقوم من الفراش مثل الجني والا انا بعد اتوضى ولمن يسافر أبوي وتجيني المسكينة الله يرحمها وتصحيني روحي انتي ورجلك ما بلشتينا انتي ورجلك ما منك فايدة انتي وحنا ما نقدر الا على الأمهات والمساكين ما نقدر على الابو لا عصي وهي ماخذة الدور هي الاب وهي الام وهي كل شي وفوق كل هذا تعال شوف الصبح . أنا اذكر جانب بيتنا كان في سوق يسمونه سوق حراج مؤقت الساعة تقريبا 6:30 الى 7 الا ربع وتعال شوف يومه وين شرابي يومه وين غترتي يومه وين هذاك يومه وين هذاك اقدر اقول لابوي يوبه وين شرابي ما اقدر وكان من يصحيني أروح المسجد على طول وأشوف في شباب وايد لما يصير في خلاف بينه وبين ابوه يحط امه الواسطة . اقولك نعم روحي قولي حق رجلك (أبوه هو) خله يعطيني 50 . زين أنت روح قوله لا ما ابغى انتي روحي قوليله فطبعا هي تكون الواسطة وهذا غلط في العلاقة بين الأب وما بين الابن. ولكن وبالوالدين إحسانا رسالة يوسف الصالح لكل واحد موجود اللي عنده أم وأب على قيد الحياة أول ما يطلع من هنا يروح يبوس راسهم ويقول لهم آسف لأنه رح يجي اليوم اللي ما يلقاهم ويحن عليهم لأني أنا فقدت أمي الحين لأني أنا كنت أدور أمي الحين والله يا شباب أمي ميتة من 10 أيام والله ما إني مصدق إنها ميتة والله إني قاعد أروح لها الغرفة وافتح باب الغرفة واقعد أطالع الغرفة وأتذكرها واللي الحين يتنعم بأمه وأبوه وموريهم شقى الله ما رح يعاقبنا إلا بوالدينا وهذه من أسباب تعاطي المخدرات يحرصون عليها الناس كانوا أول يقولنلي ربعي ايش هذا أب معقد عندك يا شيخ خلوني أؤمن إن أبوي معقد . ايش هذا يا أخي أبوك هذا ايش هذه أمك يا شيخ وخلوني اكره أمي خلوني أوريهم نجوم الظهر ولكن ابوقلكم على سالفة . 
| 
( تقرير عن مشاركة مخالفة
) 
المواضيع المتشابهه للموضوع: محاضرة كتابية للشيخ يوسف الصالح روووووووعة (الجزء الأول) 
العرض العادي
