ro7dubai

عندي ولد اسمه خالد اتصلت في زوجتي وقالتلي خالد مو بالبيت أنا كنت بالعمل خالد مو بالبيت وينه قالت لي دورت عليه بالبيت ما حصلناه رحنا البقالة ما حصلناه واجي بسيارتي خطف جيت البيت امشي مليون وقلبي في حسرة ياللي تأذي أمك وأبوك الحين بكرة ولدك رح يأذيك ويوم وصلت البقالة الأولى وما لقيته والبقالة الثانية ما لقيته صدقوني يا شباب نزلت من السيارة قلت السيارة ما تخليني أدور ونزلت امشي واركض ركض طاح شماغي وطاحت نعالي وأنا ادور وانا اقول الله لا يسويلني مثل ما سويت حق أبوي كرة مطاطية تطقها هناك ترجع عليك بيوم من الأيام مثل ما تعاملهم يجي يعاملونك عيالك إلا من رحم الله
صالح ولدي طلبني فترة من الفترات إني القي محاضرة عنده في المدرسة ما حبيت أحرجه فرحت للمدرسة ولقيت ربعه تعرفون صاير بطل كذا أبوي اللي بيحاضر شوفوا فجبته وجلسته جنبي عند الطاولة فما حبيت أحرجه وأتكلم عن المخدرات تكلمت عن علاقتي مع أبوي وعلاقة حقوق الوالدين إذا ما صارت مضبوطة فيعني ما رح نرتاح بالحياة حق الطلبة يعني فلقيت واحد الظاهر في مشكلة بينه وبين صالح قام يقولي أنت تعامل ولدك صالح كده يعني يبي يحرجني ويحرج صالح فقلتله أنت ليش تكلموني هذا صالح عندكم قولوله فصالح أرسل لي رسالة بكلمتين قال لهم أبوي أول ما هو كويس الحين أبوي كويس اتحسبون أبو سنة وسنتين وثلاث وأربع وخمس ما يحس قلتله قول اللي يريحك . جيته مرة وقلتله يا باب خلنا نروح بيت عمك نتغذى وركب وياي بالسيارة وهو متضايق قال يا بابا أنا رايح بيت عمي علشانك أنت قلتله بابا ليش قال نسيت يا باب يوم أنا صغير ويمسكونك ويربطونك ويطقونك نسيت يا بابا. اوخ وانا اقول ما يدري
جاني واحد في مستشفى الأمل يا شباب أقول الكبك يمكن 25 ألف ريال والقلم اللي حاطه وسيارة شبح وهذاك الولد كشخة قال أنا مدمن مخدرات قلت تفضل وقعد عندي اسبوع بعد حوالي اسبوع جاني الممرض وقالي في حرمة عجوز تبغاك بره وإلا جيت هذه العجوز جاي حافية بليموزين وعكازها معاها قالتلي انت يوسف الصالح قلتلها اي قالت أنا أم عبدالله قلتلها أي عبد الله قالت عبد الله فلان فلان فلان قلتها ايش فيه قالت أنا أمه قلت لها مستحيل تكونين أمه هذا مبين عليه ولد ناس جاخ قالت يا ولدي أنا على الله ثم على المحسنين ولدي يسحب كل مال السوق يلعب فيه شفتوا النذل يوم كانت تقولي سوالف تطير المخ بيتنا أجار وغدانا وعشانا على الله ثم على المحسنين قلتلها بس ولدك عنده شبح وقلمه قيمته الفلاني والله لو يبيع القلم يعشيهم 4 أيام قالت يا ولدي هذا كله من مال السوق يسحبني ويخليني أنا وإخوانه نروح نفر من جديد . عقوق الوالدين السبب الرئيسي بعد الدين .
السبب الثاني العلاقات مع الأسرة تعالوا شوفوا علاقاتنا مع الأسرة لو استثنينا الأم والأب وبقى الأخ والأخت والزوجة هي قمة البلاء. أما زوجتي 16 سنة زوجة 16 سنة تحملت الضيم ولكن كان في صبرها العجب قلت لها قوليلي شنو اللي أنا أذيتك فيه بالمخدرات قالت لي يوسف أنا أهم شي عندي كنت أشوفك تموت ولا قادرة أسويلك شي أشوفك وأنت تنتحر ولا قادرة أسويلك شي عشان كده أنا قاعد أقول حق الإخوان اللي عندهم مشاكل في التعاطي في المخدرات وإلا مشاكل بينه وبين زوجته أقوله ارحم زوجتك تكفى ارحم زوجتك والله يرحمها أنا ما كنت راحمها. اله يغفرلنا في مرة من المرات داش وأنا وياها كل ما جيت البيت أمي تحت تدرسها وفوق تجيني (ددددددد) اترك المخدرات اترك المخدرات أنت تأذيني وأنا جاي مطروخ بطقها ايش اسويلها. كان عندي حبوب يسمونها حبوب روش أول ما جيت إلي يخليك عطني واحد ليك وواحد لي عطيتها زين افرض إنها أدمنت عليها المهم أنا ارتاح مو ضروري العالم شو يصير لهم لا المهم أنا ارتاح مو ضروري العالم شو يحسون لا المهم أنا ارتاح وبس أناني أنا أبغى ارتاح . تعالوا شوفوا علاقاتنا مع الأسرة فقدت الاخ والاخت وانا دائما انظر لأخوي انه نذل لان أبوي يحبه أكثر مني لأني أنا مو محبوب لأني أنا محسود لأني أنا ذكي فيقعد هذا رفيق السوء هذا الشخص اللي سحب دينك وعلاقتك مع والدينك يبغي يسحب من عندك علاقاتك مع اهلك
الشي الثاني أصدقاء السوء وما أدراك ما أصدقاء السوء اللي في يوم من الأيام طالع من البيت ولقيت أبوي يتكلم ويا واحد من ربعي جايبلي مخدرات واسمع ابوي يقوله أنت مو برجال أنا صراحة جتني حمية على ربعي ورحت لأبوي وقلتله أصلك أنت مو برجال تعرفوا ايش قال لي أبوي روح الله يهديك أقولكم على سالفة ثانية في عندي جار متعمد انا متعمد كل ما أصلي الفجر أطالع بيته كذا بيته اسود هرمس ما به ولا لمبة فيوم من الأيام حوالي فترة بسيطة فجيت ولقيت لمبة غرفته مولعة على صلاة الفجر طالع المسجد قلت عسى ما شر ليكون جارنا خوينا فيه مرض وإلا شي وإلا يمكن اهتدى يبي يجي المسجد رحت اصلي في المسجد صلاة الفجر أدور يمين يسار ما لقيت خوي عاد اشتغل عندي حب استطلاع ما اقدر قلت خلني أطق عليه الجرس يا يوسف الحين مو وقته الدنيا ليل خله الصبح تسال عنه قلت لا بسال عنه الحين طقيت عليه الجرس طن ما فتح طن ما فتح طن طن فتح شباك مين قلتله أبو صالح قالي جايلك نزلي قلت له فلان حقه ما شر أشوف لمبتك مفتوحة ليكون واحد من العيال وإلا أنت مسخن قالي لا هي مباراة الأرجنتين والبرازيل سهران علشان مباراة الأرجنتين والبرازيل
نيجي على الفقرة الثانية واللي هي التقليد وحنا نحب التقليد ترى على فكرة مرض التقليد صايب مو هو بس المدمن الحين الأم تقلد والأب يقلد تعرفون هذا لاعب البرازيل اللي حاط على جسمه وشعره كده واش اسمه هو هذا رونالدو راح للحلاق يبي يحلق اقرع وخربت عليه الماكينة وبقت هذه وعليه مباراة فقال حق الحلاق كملي وراء المباراة نزل للملعب وهذه موجودة صار شبابنا بالسعودية كلهم قصوها رونالدوا المسكين تعجب يوم شاف كل العالم هنا ليش قال لأنه اللاعب الفلاني يسويها زين وشو اللاعب الفلاني هذا . يا عم أنت معقد. ماشي بالسوق ولقيت 3 يمشون أهم 3 بس 6 وإلا معطينا ظهورهم يمشون وإلا عليهم بنطلونات كل واحد بنطلونه 60 نعش ويسوي كذا بالبنطلون وش وش ما في عظام بنطلون يتحرك ليش يا أخي وش السالفة قال يا اخي هذه موضة . وشو الموضة موضة بس ما تصلح لك أنت . كنت رايح اجتماع للمدارس وإلا واحد يا جماعة رقبته هالطول وإلا قاعد قبالي وأنا قاعد أتكلم وشدني الانتباه له رقبته هالطول وحاط هنا 650 ألف زر قلت والله ما أخليه نهاية الجلسة لازم اسحبه وأناديه جيتله قلتله يا أبو الشباب قالي تم قلتلوا يا اخوي وش هو هذا 1،2،3 وشو هذا قال هذه موضة قلتله موضة ليش قالي لأنه المدرسة أشوفهم كلهم مسوينها قلتله اللي في المدرسة رقبتهم هالطول وأنت رقبتك هالطول تبغى التقليد يصلح لي يصلح لديني يصلح لمجتمعي ما اعرف المهم إني البس وهذا كان أسباب .