 ...:: جايتك بعثه للخارج .. وانت موظف الآن ... وماتدري وش تسوي .. أدخل أبيك شوي ::..
السلام عليكم ورحمه الله وبركاته
-- مرحبا للجميع --
بتكلم اليوم في موضوع ... امممممممم ممكن يكون مهم للبعض ... فتكون الحيره في باله كثير .. ويكون
التفكير دااااااااايم مشغله ... ومايدري وش يسوي .. ويحس الدعوه كلها محتاس ..!!
بخص كلامي لشباب اللي يحمل شهاده البكالوريوس أو شهاده ماجستير أو معاه دكتوراه ... وهو على راس العمل حاليا ...طبعا مثلكم عارف ... صعب الآن واحد معه بكالوريوس تخصص حلو .. او ماجستير او دكتوراه .. ويكون عااااااااطل .. يعني جالس في البيت ... 
يعني راح نتكلم الان فقط فقط ... عن اللي معاه احد هالشهادات .. وعلى راس العمل ... ( وعنده طموووووح أنه يكمل دراسات عليا ) ...
طيب أنتم عارفين أن الواحد إذا يبي يكمل دراسته على حساب الوزارة ...
لازم يستقيل من وظيفته ( مهما كانت ) ... لكي يمسح اسمه ورقمه من التأمينات ... وهذا شرط أساسي ... والا ما راح تبتعث ..
طيب وش الحل ؟؟!! ... وش أسوي ؟؟!! ... أستقيل وأسافر ...!! وألآ بس أجلس في وظيفتي ..!!
طبعا الكلام اللي بقوله مجرد رأي ... والواحد عليه الأختيار ...
انصح أي واحد في مثل هالظرف ... وفي مثل هالموقف ... انه يجيب ورقه وقلم ... ويكتب النقاط التاليه .. او بعضها ... ( لأن مجرد أنك ما تفكر في اشياء ونقاط . مجرد تفكير في مخك من دون كتابه ... التفكير هذا يحرمك من ايجاد الحلول ... لكن لو كتبت الافكار والمعوقات ... ترجع لمخك يبدا يدور الحلول ...)
بذكر بعض النقاط .. وانت احسبها على نفسك ... وشوف هل هي سلبيه او ايجابيه لك ...
- الوضع العائلي -
-- متزوج --
هل راح آخذ عيالي وزوجتي .؟! ... ام أن لهم ظروف ما يقدرون يسافرون ... مثل ان الزوجه موظفه .. أو لها ظروف ما تقدر تسافر أو أو أو .... هذه اذا كانت موجوده تحسب كسلبيه ... اذا والله لا عادي زوجتي ممكن تروح معاي وماعندها أي مانع وعيالي ايضا ممكن اخذهم ... هذه تحسب لك ايجابيه
--- العزوبي ---
هذا ممكن أخف اموره شوي من المتزوج ... ولكن برضو عنده امور أخرى ... مثلا يقول متى راح اتزوج ؟ هل اذا خلصت الدراسه ... يعني بعد 3 سنوات تقريبا ... او ممكن بعد اول سنه اجي هنا واتزوج واخذها معي ؟ ... طيب هنا يحكم هل اللي تبي تتزوجها راح تروح معاك ... هل ماعندها التزامات .. وكذا تدخل في قسم المتزوجين وهنا انت تحدد السلبيه والايجابيه ... والبعض يقول لا والله انا الحين عمري 27 ... بسافر اخذ الماجستير وارجع بيكون عمري تقريبا 30 سنه ... طيب متى اكون نفسي عشان اتزوج .. كم يبي لي تقريبا سنتين .. يعني بتزوج وانا عمري 32 ؟؟!! .. هذه برضو فكر فيها ... وابرضو احسبها ايجابيه او سلبيه لك وحسب وضعك وتفكيرك انت ...
- الوضع الأسري -
وأقصد فيه ... أن فيه عوائل .. ما يقدرون يستغنون عن أولادهم مهما كان ... يعني تلاقي الولد له مكانته في البيت .. شايل البيت على راسه ... او انه لا قدر الله الأب متوفي .. او غير موجود في العائله .. فيكون الولد هو راعي البيت .. ومعتمدين عليه كثير ... فسفره كم سنه راح يخلق فراغ كبير .. وممكن يخلق مشاكل ... فالشخص برضو ما يفكر في نفسه بس .. وانه راح يدرس ويجيب شهاده .. لازم يفكر في أهله وعائلته اللي حوله .. وهل ممكن يستغنون عن خدماته في الفتره هذه .. او لا والله مستحيل يبعد عنهم الفتره هذه ... هنا تحسب ايجابيه لك اذا ممكن .... وتحسب سلبيه اذا مو ممكن ...
- الارتباطات الماليه -
واقصد فيها .. ان البعض مثلا ماخذ قرض من بنك .. او من شخص ... او عنده ديون ...او عنده اقساط ... او نقدر نقول عنده محلات .. وبزنس .. وهو اللي يديرها .... او ممكن نقول توه مستاجر بيت ... ومصلحه ومزينه وووووو .. وكيف بيجي وضعه لو ترك هالبيت بعد هالتعب ...
هنا ممكن ترجع لك ... هل ما عندك هل الامور .. او ممكن تحلها بشكل ما يضرك .. هذه ايجابيه لك .. وممكن تقول لا والله صعب جدا .. وصعب جدا مثلا اترك البزنس حقي .. لازم انا اتابعه بنفسي .. فهذه تسجلها سلبيه ...
- تأقلمه مع العيش الغربي -
البعض جرب السفر للدول الأوربيه ... والغربيه ... وجرب يسكن معهم .. وجرب يحتك معهم .. ويتكلم معهم .. ويعرف كيف يفكرون .. وكيف يمشون أمورهم ... فالبعض يقول والله انا سافرت اول .. واحس بكتمه لما اعاملهم .. او امشي مع الستايل والوضع اللي هم ماشين عليه ... مو زينا هنا في السعوديه الوضع متغير ... وأتمنى بس متى أخلص شغلي اللي سافرت له ... عشان أرجع لديرتي ... هذه يسجلها سلبيه ... والبعض يقول لا والله عااااااااادي جدا ... ممكن اسافر وانا جربتها .. وعادي جدا اتعايش معهم عادي وادخل معهم واحتك في الغربي .. وماعندي أي مشاكل ... هذه تسجل له ايجابيه
- قابلية الشخص للدراسه -
البعض الله يهديهم ... سمع بالتسجيل في وزاره التعليم العالي ... وشاف العالم تسجل .. قال معكم معكم .. وش ورانا ... ويكون بداخله عدم قابليه للدراسه ... يعني خلاص وصل لمرحله التشبع .. وخاصه اذا كان مخلص مرحله السابقه بشق الأنفس ... فشاف العالم تقدم .. قال معكم ... ( طبعا ممكن يقول لك لا الوضع هناك يختلف .. اذا رحت هناك راح ادرس غصب عني .. هذا شي راجع له صراحه ) ... فهذه اعتقد انها سلبيه ..
وفيه القسم الثاني اللي هو والله في راسه دراسه ... ويبي يدرس .. والدليل مثلا معدله في المرحله الدراسيه الماضيه له ... كان معدله مرتفع ... ( بالعربي مخه مفتح وناوي على دراسه ) ... هذه تحسب له ايجابيه ...
- الوضع الوظيفي -
البعض ما شاء الله متوظف في وظيفه مرموقه ... وراتب حلو ... ومرتاح في وظيفته .. ويمكن تعب كثير لين حصل هالوظيفه .. فيكون متردد كثير ... يقول اترك هالراتب !!! اترك هالمنصب !! كل نهايه شهر ينزل راتب وقدره في حسابي ... هل ممكن استغني عنه ..!! هذا ممكن تحسب عليه سلبيه ... ويقول عصفور حلو في اليد ... ولا عشره حلوين على شجره امريكيه ....
وفيه البعض يقول لا والله انا صراحه وظيفتي لك عليها .. او مدري وش تبي ... والراتب بعد ما يسوى .. انه مو طموحي وانا اطمح لشي اعلى .. او ان بيئه العمل اللي هو يشتغل فيها ما تساعده .. ولا ارتاح فيها الارتياح اللي ممكن ينتج ويعطي ... هذا اعتبرها لك ايجابيه النقطه ... ويكون ميله للدراسه في الخارج اكثر ...
- نوع التخصص -
اكيد ان هؤلاء الموظفين من خلال الخبرة الي تكونت عندهم وهم على رأس العمل شافوا الحاجة لبعض التخصصات اللي ممكن تفتح على الشركات مكاسب كبيرة والي فيه عليها طلب كبير مع انها لا تُدرس في جامعاتنا. بمعنى اخر تخصص يوظف حاملة وهو حاط رجل على رجل بمركز جدا ممتاز.
مثال: التجارة الدولية أو العقود القانونية الدولية أو هندسة المولدات الكهربائية بالطاقة الشمسية وهكذا..
اعتقد ان هذي فرصة جيده لهم بالاستقالة والعودة الى نفس الشركة.
- تغيير مجال الوظيفة -
كثير منا بعد ما يدرس التخصص الي عجبه ايام الجامعة للاسف يتوظف على غير تخصصة وخاصة المهندسين.
أو يدرس تخصص كان حلو وجميل ايام الدراسة لكن على ارض الواقع سيء ومحبط العمل فيه.
هنا يبدا التحسف ويقول ياليتني دخلت تخصص كذا وكذا ... فهنا تكون نقطه ايجابيه بالنسبه له
- نقطه أخيره ... -
بعد ما تشوف النقاط الي تكلمنا عنها ... وتكتبها في ورقه .. وتحسبها زين ... يجي الأن أهم شي .. وهي صلاه الاستخاره ... تتوضأ .. وتكون نفسيتك زينه ومرتاحه .. وتصلي لك ركعتين ... وتدعي ربك دعاء الاستخاره المعروف ... وبعدها تشوف ربك وش يكتب لك ... والأفضل أنك تستخير أكثر من مره ...
هذه بعض النقاط اللي كانت في بالي الأيام اللي راحت ... وكل مره أقول راح اكتبها .. راح اكتبها ... وخاصه اذا مثلا جلست مع واحد من الشباب في الوضع هذا .. ومحتار وش يسوي ... فيكون نقاشنا على الامور والنقاط اللي ذكرتها ..
طبعا هناك امور أكثر وأكثر ... لكن بإعتقادي أن هذه هي الأهم ..
.
أختم بقول الله عز و جل .... (وعسى أن تكرهوا شيئا وهو خير لكم )
تحياتي للجميع
أشوفكم على خير
دمتم بود
آخر تعديل بواسطة عاشق اسيل بتاريخ
06-01-2008 الساعة 06:14 PM . | 
( تقرير عن مشاركة مخالفة
) 
العرض العادي
المواضيع المتشابهه للموضوع: ...:: جايتك بعثه للخارج .. وانت موظف الآن ... وماتدري وش تسوي .. أدخل أبيك شوي ::.. 