| البارحه من همومي ضايق صدري
البارحه من همومي ضايقٍ صدري = في ها الحياة الشقية هاجسي حاري
دنياً بها كل حيٍ ماشيٍ عبري = الرابح اللي سلم فيها من العاري
يلومني مستريح غافي هدري = من خلقته غوج لا شيور ولا شاري
صبرت لين اقتصيت وطول الصبرِ = أقول كود الفلك بالصبر ينداري
لا مت ما احدٍ مساعدني وأنا بقبري = ما ينفع الهرج لا منه جرى الجاري
في عالي الرجم دايم كنني سبرِ = ينساح بالي إلى منه عوى ضاري
لي عادة مثل غير ما احمل الكبرِ = وادمح خطا الجار ما غثي على جاري
أمشي متر بالوفا للي مشى فترِ = بالضيق للي صفا مانيب بوّاري
ليا شاخ في حي دار قاصر الشبرِ = بدلت دار الجفا والذل بدياري
يا الله يا رب يا خلاق يا مبري = يا منزل الغيث يا رزاق يا باري
يا واحدٍ ما لاحد في دبرتك خشرِ = يا معيش بالعش مختلفات الأطياري
تبري عليل وطته سنينها الغبرِ = ما تنعرف علته لو حط منظاري
للي ردي لو قريب جد من يشري؟ = نبيع برخيص يا سوام يا شاري
ترى العرب قيظوا يا كاعب البدري = اشتر ثياب الستر واستتر يا عاري
يا خوخ يا تين يا رمان يا سدري = شرع على ماً قراحٍ غب الأمطاري
احرص على زمركم يا راعي الزمر = سحم الضواري ضوت والذيب غداري
يا محارب المرجلة يا ميت الذكر = ما لك دلالٍ تراكى صفر بو جاري
درب المراجل على راع الردى عسري = ما يمتهنها سوى الوافين الأخياري
لا يفرسنك ذيابة نجد يا وبري = دور عن ديار وافين الشبر داري
لا هاج موج البحر لا تقرب البحري = قاع البحر فيه حوت وفيه محاري
احدٍ صعد فوق واحدٍ دون منحدري = لا بد من عقب المسناد محداري
ما همني خايع متهور دهري = على الخلايق ضعيف العقل زماري
دايم مع البيض باقصى البيت منثبري = وان فاض للسوق جيبه ما به ازراري
أبا حقب يدّرج شرّه يبي الوكري = والوكر فوقه نداوي حر غياري
يا ما كر البوم وشبك تحسبك صقري = ما ينقلك في ليال القنص صقاري
يوم الجنايز لها بالمعركة نطري = وانتم ترى بين بقارٍ وحماري
تفكري وابصري وافهمي يا هكري = حتى تعرفين ميرادي ومصداري
يعرف عريب البدو ومعرب الحضري = ما فيه قصر بلا مدخل ومظهاري
يا ساري الليل جنح الليل لا تسري = راعي المساري يتيه الدرب يا ساري
كم ضاربٍ للمهالك مادرى غدري = صاحي ترى الوقت لو لك زان غراري
ياما هلك به رجالٍ بالقسا نذري = على نصايب مقابرهم ذرى الذاري
انشد عن سنين حجرٍ وش جرى لحجري = عن عرش ملكه سريعٍ زاله الزاري
امداري الناس شاب الراس ما تجري = كثر المداري يعيب الرجل يامداري
عنّز على اللي لعبده يكتب الأجري = بمزارع الزيف لا تغريك الأزهاري
يا ثقل حملي بها الدنيا ويا صبري = عز الله إني على الشطات صباري
أسهر واسامر نجومٍ بالسماء زهري = ودموع عيني كما همال مدراري
أنحب نحيب الصويب مديب من كسري = ما ينوجد للكسر بالدين جباري
ينام خال الهموم آمن وانا سهري = يحرم علي المنام إليا طرى طاري
اليا نشدني غشيم قلتله مدري = أقول للمشتبه مدري وانا داري
واجد بها الوقت مثل الدب منحشري = كرسي موظف إلى من دير ينداري
ناسٍ يغارون من خسار بالعسري = لعل ينزل على واديهم اعصاري
وينجي عريب بداره قاصره فجري = آراذلٍ ثلث سقط وثلث مكاري
عند الكلاب الجعارا عارفٍ قدري = مطولٍ للعصا في سر واجهاري
لو مسكني بالمعزه في خلا بخدري = احسن ولا قصرة اللي سلكهم عاري
أسأل بكل المعاني واحدٍ خبري = ساس الردى لو تكا لا بد ينهاري
من شيل حمل العناء كني على جمري = صدري من الضيق كنه فوق مجماري
لعل عقب العسر يا خالقي يسري = يا فارج الكرب يا ماحي للأوزاري
يا مجري الكون يا داري بما يجري = يا مدير الأفلاك يا علام الأسراري
هيهات هيهات لو يرجع لنا عصري = عصرٍ مضى يفرق الصافي من الصاري
أفطن لساس القصر يا ساكن القصري = ترى المراجل ما هيب أسوار وأدواري
غناتي بعز نفسي تبعد الفقري = أتاجر بعزها وأفوز واماري
من شرب صافي لزوم يشرب الكدري = يا شاربٍ نقع مدرارٍ لجا بغاري
كم حلة شيدت وابطالها الوطري = طوق على ارجالها فرسان وامهاري
من فجر لين العصر يجزر بهم جزري = بالسيف والحضرميه وام شنكاري
راحت ادماهم ومن غرر بهم هدري = إلى استدارت رغا من كان هداري
عقب الرخا كنهم في ساعة الحشري = يا شين عقب المعزه ذل الأحراري
ما ينجلي ضيم عم(ن) ضيم بالهذري = إلا بمتر حني للظهر بتاري
شرثٍ يعدل ميل من كان به زمري = من كف قرمٍ إلى من صار ما صاري
معربٍ ساطي له بالظفر شطري = من لابةٍ باللقاء ترخص بالأعماري
بيضٍ صفحاتهم توضي كما البدري = تعرف تواريخهم سكان الأمصاري
ليا صار لك عزوةٍ تزجر بهم زجري = ليا قيل ياهل العوايد والدخن ثاري
واللي حياةٍ تقصر طايل العمري = يهدّد اذيابها طليان مخضاري
يا عادلٍ ميلها يا والي الأمري = يسر لنا عن طريق الضيق معباري
يا بو جعود ضفت فوق المتن شقري = يا غصن موز تثنى فوق الأشجاري
يا قايد الريم يا جذاب يا عفري = حكمك على اهل الهوى يا جاير اجباري
حسيبك الله يا غرو نوى هجري = شيب براسي وفتح في الأنظاري
كم هي نجوم الحيا يا زيد يا عمري = تلاشت الماشيه من كثير الأدهاري
تغيرت حال وافي الباع عن خبري = يا طير وده خبر واجني بالأخباري
أنا شفاتي عريبٍ واجعله ذخري = ما همني دق عود وصوت مزماري
لا نام غيري عيوني نومها نزري = دايم على وجنتيني دمعها جاري
حالي كما عود ثنٍ يا بسٍ مبري = بالموس باريه بسنين المحل باري
امشطرٍ مثل عودٍ طايحٍ جدري = يومي بقلع المدى لا شاف مراري
وإلا غرير بلجات البحر دجري = وقع بجنح الدجى والسفن عباري
وين أنت يا خضر وينك يا حسن بصري = من هو قبيلي اليا من حارت افكاري
يبصر ببيرٍ لتجديد القشر حفري = انشر عن الذل قبل الذل منشاري
الحمد لله والتعظيم والشكري = هبت هبايب صحاري نجد يا ذاري
لا والذي نزل الأعراف والعصري = إني فلا اقصد يموم الجدي ومباري
من شانت ابطانته ما ينغبط عثري = قصاص الآثار يقتصه بالآثاري
يا جالبين التمر في عاصمة هجري = ما احدٍ عرف من عربكم ويش الأسعاري
نادى المدوه لذودٍ واردٍ عفري = واهتال جذاب دلو الورد واحتاري
وارزت على الحوض ترزم وجبة الظهري = الجل صارت يمين ودقها ايساري
معها عشاير همل حشوانها قشري = لها من العام يا ستار دواري
دارت وراجت وهجت وانتوت فجري = اللي لها حوار واللي ما لها حواري
صارت مداهيلها من بعدها قفري = ما عد لها مع جميع الناس تذكاري
ومياح دلو العنا ينخى إلى العصري = وبيت المدوه شلعه عصير معصاري
وعلى غصونٍ تمايل غرد القمري = والمستريحين ما يدرون سماري
العذف ما نقبله لو طول الدهري = لعلنا من حسان الحور نختاري
اصبر على الهجر والحرمان يا نمري = لا صرت في دار والمرغوب في داري
في كل الأسواق طيبة السلع ندري = حذوة فرس طايحٍ من خلف مسماري
يا هيه يا هن يا مغرور كن حذري = إن جيت مع طرق فيها شك مراري
قضت حياتي وانا اللي ما انقضى وطري = اسنين ما تنقضي فيهن الأوطاري
القلب يقرع مثل ما يقرع النجري =نجرٍ عريب صخي مدهال خطاري
يكفخ بصدري كفيخ مذير الكدري = لولا ضلوعي تضكه بالحشا طاري
والناس فيهم عزيز النفس منتظري = عاري لفاله على من لا ادرك ايزاري
يا رب تمحى ذنوبٍ أثقلت ظهري = يا غافر الذنب تنجيني من الناري
وافتح لنا باب يا خلاقنا نصري = يا مفرج الضيق يا منجي هل الغاري
هذا وصلوا على من به صحيح اسري = إعداد ما زار بيت الله زواري
آخر تعديل بواسطة متلثمه بشماغ بتاريخ
08-06-2008 الساعة 07:18 AM . | 
( تقرير عن مشاركة مخالفة
) 
العرض العادي
المواضيع المتشابهه للموضوع: البارحه من همومي ضايق صدري 